2026 ഒക്ടോബർ 15 വ്യാഴം
ന്യൂഡൽഹി: ഡൽഹി കൊണാട്ട് പ്ലേസിലെ സെൻട്രൽ പാർക്കിൽ ഒക്ടോബർ 16-ന് കോക്രോച്ച് ജനതാ പാർട്ടി (സി.ജെ.പി.) നേതാവ് അഭിജിത് ദിപ്കെയും പ്രവർത്തകരും നടത്തുന്ന പ്രക്ഷോഭം തടയാൻ ഡൽഹി ഹൈക്കോടതി വിസമ്മതിച്ചു. എന്നാൽ, പ്രക്ഷോഭം നിയന്ത്രിക്കാൻ നിയമപരമായ എല്ലാ നടപടികളും സ്വീകരിക്കുമെന്ന പോലീസിന്റെ ഉറപ്പ് ആക്ടിങ് ചീഫ് ജസ്റ്റിസ് നിതിൻ വസുദേവ് സാംബ്രെ, ജസ്റ്റിസ് സഞ്ജയ് ശർമ എന്നിവരടങ്ങിയ ബെഞ്ച് ഉത്തരവിൽ രേഖപ്പെടുത്തി. പ്രക്ഷോഭം നിയന്ത്രിക്കാൻ പോലീസിന് നിർദേശം നൽകണമെന്ന് ആവശ്യപ്പെട്ട് കൊണാട്ട് പ്ലേസിലെ തെരുവ് കച്ചവടക്കാരൻ സമർപ്പിച്ച പൊതുതാല്പര്യ ഹർജി പരിഗണിക്കുകയായിരുന്നു കോടതി.
ഉത്സവകാലത്ത് ഡൽഹിയിലുണ്ടാകുന്ന പ്രക്ഷോഭങ്ങളും അതിനെത്തുടർന്നുള്ള അടച്ചിടലുകളും കാരണം കച്ചവടം നഷ്ടപ്പെട്ടാൽ വ്യാപാരികളും തെരുവ് കച്ചവടക്കാരും പ്രയാസത്തിലാകുമെന്ന് ഹർജിക്കാരനുവേണ്ടി ഹാജരായ മുതിർന്ന അഭിഭാഷകൻ വാദിച്ചു. പാലികാ ബസാറിൽ റെഡിമെയ്ഡ് വസ്ത്രങ്ങൾ വിൽക്കുന്ന ലൈസൻസുള്ള തെരുവ് കച്ചവടക്കാരനായ അനിൽ കുമാർ ഗുപ്തയാണ് ഹർജി സമർപ്പിച്ചത്. കൊണാട്ട് പ്ലേസ് പ്രക്ഷോഭങ്ങൾക്കായി നിശ്ചയിച്ച സ്ഥലമല്ലെന്നും സെൻട്രൽ പാർക്കിൽ സമരം നടക്കുന്നത് പ്രദേശത്തെ കച്ചവടത്തെ സാരമായി ബാധിക്കുമെന്നും ഹർജിക്കാരനുവേണ്ടി ഹാജരായ അഭിഭാഷകൻ ചൂണ്ടിക്കാട്ടി. ദസറ വാരാന്ത്യമായതിനാൽ ഈ പ്രക്ഷോഭം തടയണമെന്നും ഹർജി അടിയന്തരമായി പരിഗണിക്കാൻ ആവശ്യപ്പെട്ട വേളയിൽ അഭിഭാഷകൻ വ്യക്തമാക്കിയിരുന്നു.
സി.ജെ.പി.യുടെ പ്രവർത്തനങ്ങൾ നിയന്ത്രിക്കാൻ നടപടികൾ സ്വീകരിച്ചിട്ടുണ്ടെന്നും ഹർജിക്കാരന്റെ ആശങ്കകൾ പരിഹരിക്കുമെന്നും അഡീഷണൽ സോളിസിറ്റർ ജനറൽ കോടതിയെ അറിയിച്ചു. വിഷയത്തിൽ എതിർകക്ഷികൾ നടപടിയെടുത്തിട്ടുണ്ടെന്നും ആവശ്യമെങ്കിൽ നിയമപരമായ എല്ലാ നടപടികളും സ്വീകരിക്കുമെന്നും എ.എസ്.ജി. ഉറപ്പുനൽകിയതായും കോടതി ഉത്തരവിൽ വ്യക്തമാക്കി. കേസ് കൂടുതൽ വാദം കേൾക്കുന്നതിനായി നവംബർ 3-ലേക്ക് മാറ്റി. സി.ജെ.പി.യുടെ പ്രക്ഷോഭം തടയാൻ പ്രത്യേക നിർദേശം നൽകണമെന്ന് ഹർജിക്കാരന്റെ അഭിഭാഷകൻ വീണ്ടും ആവശ്യപ്പെട്ടപ്പോൾ, “നിർബന്ധം പിടിക്കരുത്, ഞങ്ങൾ ഉത്തരവ് പുറപ്പെടുവിച്ചു കഴിഞ്ഞു” എന്ന് ബെഞ്ച് വ്യക്തമാക്കി.