2026 ഒക്ടോബർ 14 ബുധൻ
മീററ്റ്: രാജ്യത്തെ ഞെട്ടിച്ച ‘ബ്ലൂ ഡ്രം കൊലപാതക’ കേസിൽ പ്രതികളായ മുസ്കാൻ രസ്തോഗിക്കും കാമുകൻ സാഹിൽ ശുക്ലയ്ക്കും വധശിക്ഷ. ഉത്തർപ്രദേശിലെ മീററ്റ് ജില്ലാ ആൻഡ് സെഷൻസ് കോടതി ജഡ്ജി അരവിന്ദ് കുമാർ മിശ്രയാണ് ശിക്ഷാവിധി പ്രസ്താവിച്ചത്. മുസ്‌കാന്റെ ഭർത്താവും മർച്ചന്റ് നേവി ഉദ്യോഗസ്ഥനുമായ സൗരഭ് രാജ്പുതിനെ ക്രൂരമായി കൊലപ്പെടുത്തിയ കേസിലാണ് വിധി. കൊലപാതകം നടന്ന് ഏകദേശം രണ്ടു വർഷത്തിനുശേഷമാണ് കോടതി ശിക്ഷ പ്രഖ്യാപിക്കുന്നത്. 2025 മാർച്ച് നാലിനാണ് മർച്ചന്റ് നേവി ഉദ്യോഗസ്ഥനായ സൗരഭ് രാജ്പുത് കൊല്ലപ്പെട്ടത്. സൗരഭ് രാജ്പുതിനെ അദ്ദേഹത്തിന്റെ ഭാര്യ മുസ്കാൻ രസ്തോഗിയും കാമുകൻ സാഹിൽ ശുക്ലയും ചേർന്ന് കൊലപ്പെടുത്തിയെന്നാണ് പ്രോസിക്യൂഷൻ ആരോപിക്കുന്നത്.
തുടർന്ന് മൃതദേഹം കഷണങ്ങളാക്കി സിമന്റ് നിറച്ച നീല ഡ്രമ്മിനുള്ളിൽ ഒളിപ്പിച്ചുവെന്നും പ്രോസിക്യൂഷൻ ആരോപിച്ചു. മീററ്റിലെ ബ്രഹ്മപുരി പ്രദേശത്തുള്ള ദമ്പതികളുടെ വീട്ടിൽനിന്ന് മൃതദേഹാവശിഷ്ടങ്ങൾ കണ്ടെത്തിയതോടെയാണ് ക്രൂരകൃത്യം പുറത്തുവന്നത്. പ്രതികളായ മുസ്കാനും സാഹിലും ചേർന്ന് സൗരഭിന്റെ മൃതദേഹം കഷണങ്ങളാക്കി മുറിച്ച്, സിമന്റ് നിറച്ച നീല ഡ്രമ്മിനുള്ളിൽ ഒളിപ്പിക്കുകയായിരുന്നുവെന്ന് പോലീസ് കണ്ടെത്തി. തുടർന്ന് മുസ്കാനെയും സാഹിലിനെയും അറസ്റ്റ് ചെയ്തു. മൃതദേഹം ഒളിപ്പിച്ച രീതി കാരണം കേസ് വലിയ രീതിയിൽ ശ്രദ്ധിക്കപ്പെടുകയും ഈ നീല ഡ്രം ഈ അന്വേഷണത്തിൽ നിർണായകമായി മാറുകയും ചെയ്തു.
13 മാസത്തെ വിചാരണയ്ക്കും 126 ദിവസത്തെ വാദപ്രതിവാദങ്ങൾക്കും ശേഷം സെപ്റ്റംബർ 30-നാണ് കേസിൽ മുസ്കാനും സാഹിലും കുറ്റക്കാരാണെന്ന് കോടതി കണ്ടെത്തിയത്. തുടർന്ന് ശിക്ഷാവിധി സംബന്ധിച്ച വാദങ്ങൾ അവതരിപ്പിക്കാൻ കോടതി പ്രതികൾക്ക് 15 ദിവസത്തെ സമയം അനുവദിച്ചിരുന്നു. കുറ്റകൃത്യത്തിന്റെ സ്വഭാവവും വിചാരണ വേളയിൽ ഹാജരാക്കിയ തെളിവുകളും ചൂണ്ടിക്കാട്ടി പ്രോസിക്യൂഷൻ പരമാവധി ശിക്ഷയാണ് ആവശ്യപ്പെട്ടത്. വിചാരണയ്ക്കിടെ പ്രോസിക്യൂഷൻ 22 സാക്ഷികളെ വിസ്തരിച്ചു. കൊലപാതകത്തിന് ഉപയോഗിച്ചുവെന്ന് പറയുന്ന നീല ഡ്രം, സിമന്റ്, കത്തി, പാത്രങ്ങൾ എന്നിവ വാങ്ങിയതുമായി ബന്ധപ്പെട്ട വ്യക്തികളും ഇതിൽ ഉൾപ്പെടുന്നു.
പ്രതികൾ വിവിധ സ്ഥലങ്ങളിൽ താമസിച്ചത് സ്ഥിരീകരിക്കുന്നതിനായി ഹോട്ടൽ മാനേജർമാരെയും ബന്ധപ്പെട്ട രേഖകളും പരിശോധിച്ചു. വിധിക്കുശേഷം വൈകാരികമായാണ് സൗരഭിന്റെ അമ്മ പ്രതികരിച്ചത്. ഒരുമിച്ച് ജീവിക്കാൻ താല്പര്യമില്ലെങ്കിൽ പരസ്പരം പിരിയുകയാണ് വേണ്ടതെന്നും അല്ലാതെ മറ്റൊരാളുടെ മകനെ കൊല്ലുകയല്ല വേണ്ടതെന്നും അവർ പറഞ്ഞു. ഇത്തരത്തിൽ ദാരുണമായ കുറ്റം ചെയ്യുന്നവർ വധശിക്ഷതന്നെ നേരിടേണ്ടി വരുമെന്നും സൗരഭിന്റെ അമ്മ വ്യക്തമാക്കി.