തിരുവനന്തപുരം: മെസി വിവാദവുമായി ബന്ധപ്പെട്ട് റിപ്പോര്ട്ടര് ചാനലില് നടത്തിയ പൊലീസ് റെയ്ഡിനെ ന്യായീകരിച്ച് മുഖ്യമന്ത്രി വിഡി സതീശന്. വാര്ത്താ സംപ്രേഷണത്തെ പൊലീസ് തടസ്സപ്പെടുത്തിയിട്ടില്ല. അവിടത്തെ റെയ്ഡ് റിപ്പോര്ട്ടര് ചാനലില് നിന്നാണ് താന് അറിയുന്നത്. ലൈവായി അവര് ടെലികാസ്റ്റ് ചെയ്തതില് നിന്നാണ് താനത് കണ്ടതെന്നും മുഖ്യമന്ത്രി പറഞ്ഞു.
മെസിയേയും അര്ജന്റീന ടീമിനേയും കൊണ്ടു വരുമെന്ന് പറഞ്ഞ് നടത്തിയ വിവാദത്തില്, കായിക വകുപ്പ് സര്ക്കാരില് പരാതി നല്കിയിട്ടുണ്ടായിരുന്നു. അതു പരിശോധിച്ച് ആഭ്യന്തര വകുപ്പ് ഒരു പ്രത്യേക അന്വേഷണ സംഘത്തെ രൂപീകരിച്ചിട്ടുണ്ട്. അവര് എഫ്ഐആര് ഇട്ട്, അവരുടെ അന്വേഷണത്തിന്റെ ഭാഗമായിട്ടാണ് റിപ്പോര്ട്ടര് ചാനലില് നടത്തിയത്. ആ റെയ്ഡ് നിയമപരമായിട്ടുള്ളതാണെന്നാണ് തനിക്ക് ലഭിച്ചതെന്നും മുഖ്യമന്ത്രി വ്യക്തമാക്കി.
നിയമപരമായിട്ടുള്ള എസ്ഐടി അന്വേഷണത്തിന്റെ ഭാഗമായിട്ടുള്ളതാണ് റെയ്ഡ്. മാധ്യമപ്രവര്ത്തകരുടെ ഫോണ് പൊലീസ് പിടിച്ചെടുത്തിട്ടുണ്ടെങ്കില് അത് അന്വേഷണത്തിന്റെ ഭാഗമായിട്ടാകാം. അത് സര്ക്കാര് നയത്തിന്റെ ഭാഗമായിട്ടുള്ളതല്ല. തട്ടിപ്പ് നടന്നതായി ജിഎസ്ടി വകുപ്പ് നടത്തിയ അന്വേഷണത്തില് കണ്ടെത്തിയിട്ടുണ്ട്. കായികവകുപ്പിന്റെ റിപ്പോര്ട്ട് പരിശോധിച്ചപ്പോള് ഗുരുതരമായ ആരോപണങ്ങള് വന്നിട്ടുണ്ട്. ഇതിന്റെ അടിസ്ഥാനത്തിലാണ് എഡിജിപിയുടെ നേതൃത്വത്തില് പ്രത്യേക അന്വേഷണ സംഘത്തെ നിയോഗിച്ചത്. വാറണ്ടോടു കൂടി നിയമപരമായിത്തന്നെയാണ് റെയ്ഡുകളെല്ലാം നടത്തിയിട്ടുള്ളതെന്നും മുഖ്യമന്ത്രി പറഞ്ഞു.
‘പിണറായി കൂടുതൽ ധാർമ്മികരോഷം കൊള്ളേണ്ട’
പൊലീസ് റെയ്ഡിനെതിരെ രംഗത്തുവന്ന പ്രതിപക്ഷ നേതാവ് പിണറായി വിജയനെയും മുഖ്യമന്ത്രി വിമര്ശിച്ചു. ഇങ്ങനെയൊന്നും ചെയ്യാന് പാടില്ലെന്നാണ് പിണറായി പറയുന്നത്. പിണറായി വിജയന് മുഖ്യമന്ത്രിയായിരുന്ന കാലത്ത്, 2017 ല് മംഗളം ടിവി റെയ്ഡ് ചെയ്ത് സിഇഒ ഉള്പ്പെടെ അഞ്ച് മുതിര്ന്ന മാധ്യമപ്രവര്ത്തകരെ ക്രൈംബ്രാഞ്ച് അറസ്റ്റ് ചെയ്തു. 2023 മാര്ച്ചില് ഏഷ്യനെറ്റ് ന്യൂസ് റെയ്ഡ് ചെയ്തു. എക്സിക്യൂട്ടീവ് എഡിറ്റര് സിന്ധു സൂര്യകുമാര്, റിജിയണല് എഡിറ്റര് ഷാജഹാന് തുടങ്ങിയവര്ക്കെതിരെ നിരവധി വകുപ്പുകള് ചുമത്തി.
മറുനാടന് മലയാളി എന്ന ഓണ്ലൈന് മാധ്യമസ്ഥാപനത്തില് പൊലീസ് പരിശോധന നടത്തി, അവിടത്തെ ജീവനക്കാരുടെ കംപ്യൂട്ടര്, ലാപ്ടോപ്പ് തുടങ്ങിയ പിടിച്ചെടുത്തു. പിന്നീട് മറുനാടന്റെ ചീഫ് എഡിറ്ററെ അറസ്റ്റ് ചെയ്തു. മാധ്യമപ്രവര്ത്തകരെ അറസ്റ്റ് ചെയ്ത കഥകളെല്ലാം പറയേണ്ടതില്ലല്ലോ. നവകേരള സദസിലെ ചെരിപ്പേറ് തൊട്ട്, എസ്എഫ്ഐ നേതാവിന്റെ മാര്ക്ക് ലിസ്റ്റ് വിവാദത്തില് ഏഷ്യാനെറ്റ് റിപ്പോര്ട്ടര്ക്കെതിരെ ഗൂഢാലോചനക്കുറ്റം ചുമത്തി, അങ്ങനെ എത്രയെത്ര സംഭവങ്ങള്. പ്രതിപക്ഷ നേതാവിന്റെ ഇപ്പോഴത്തെ ധാര്മ്മിക രോഷം കണ്ടാണ് ഇത്രയും പറയുന്നത്. റിപ്പോര്ട്ടര് ചാനലിലെ പൊലീസിന്റെ നടപടിയില് സര്ക്കാര് ഇടപെടില്ലെന്നും മുഖ്യമന്ത്രി പറഞ്ഞു.