ഡൽഹി: മുഖ്യതിരഞ്ഞെടുപ്പ് കമ്മീഷണർ ഗ്യാനേഷ്കുമാറിന്റെ രാജിയിൽ പ്രതിഷേധം കടുപ്പിക്കാൻ ഇന്ത്യാസഖ്യം. നാളെ ഉച്ചതിരിഞ്ഞ് സുപ്രീംകോടതി ചീഫ് ജസ്റ്റീസുമായി ഇന്ത്യാസഖ്യം നേതാക്കൾ കൂടിക്കാഴ്ച നടത്തും. പ്രധാനമന്ത്രിയും ആഭ്യന്തരമന്ത്രിയും രാജ്യത്ത് സൃഷ്ടിച്ച സംഘർഷസാഹചര്യം ചീഫ് ജസ്റ്റിസിനെ അറിയിക്കുമെന്ന് എഐസിസി അധ്യക്ഷൻ മല്ലികാർജുൻ ഖർഗെ വ്യക്തമാക്കി.
അതിനിടെ പ്രതിഷേധക്കാരെ തടയാൻ ഡൽഹി പൊലീസ് നടത്തിയ നീക്കങ്ങൾ ചൂണ്ടിക്കാട്ടിയുള്ള ഹർജികളിൽ സുപ്രീംകോടതിയുടെ നിർണായക ഇടപെടലുണ്ടായി. സഞ്ചാര സ്വാതന്ത്ര്യം ഇല്ലാതാക്കുന്ന നടപടികൾ പാടില്ലെന്നാണ് കോടതിയുടെ ഇടക്കാല ഉത്തരവ്. ഇന്റർനെറ്റിനും മെട്രോയ്ക്കും ഏർപ്പെടുത്തിയ നിയന്ത്രണങ്ങൾ പാടില്ല. ബാരിക്കേഡുകൾ നിരത്തുന്നതിലെ ആവശ്യകത പുനപരിശോധിക്കണം. സ്റ്റേറ്റിന് മുകളിൽ അല്ല പൊലീസെന്നും കോടതിയുടെ നിരീക്ഷണം. നിയന്ത്രണങ്ങളുടെ പേരിൽ പൗരാവകാശങ്ങൾ ലംഘിക്കരുതെന്നും സുപ്രീംകോടതി.
പൊലീസിൽ നിന്ന് നേരിട്ട അതിക്രമങ്ങൾ മുതിർന്ന അഭിഭാഷകർ കോടതിയിൽ വിവരിച്ചു. ഓടുന്ന ബസിലേക്ക് വലിച്ചിഴച്ചെന്ന് ഒരു അഭിഭാഷകൻ പറഞ്ഞു. ഹർജികളിൽ കേന്ദ്ര ക്യാബിനറ്റ് സെക്രട്ടറിയും, DMRCയും, ഡൽഹി പൊലീസും വിശദീകരണം നൽകണമെന്ന് കോടതി നിർദേശിച്ചു. സമരക്കാരെ കസ്റ്റഡിയിൽ എടുക്കേണ്ടിവന്ന സാഹചര്യം വിശദീകരിക്കണമെന്നാണ് ഡൽഹി പൊലീസിനോട് നിർദേശം.